Блог
Отандастарымыздың кез келген жетістіктері
Отандастарымыздың кез келген жетістіктері туралы оқығанда бір марқайып қаламын. Осы жолы Бразилиядағы ірі халықаралық ғылыми жұмыстар байқауының жеңімпаздары атанған Астана, Алматы және Атырау оқушылары қуантты. Іс-шара 31-ші халықаралық Mostra Internacional deCiência e Tecnologia» (Mostratec) білім көрмесі аясында өтті.
Байқаудың қорытындысы бойынша Дарын Адамов, Дәурен Әбілқасым мен Мехмет Фатих Дилекджи үзілген жапырақтардан этанол
өндірісін құру жобасы үшін алтын медальдарға ие болды (!). Алгебра мен геометриядан топтық жобалар үшін Алдияр Есеналиев, Рақымжан Қуаныш, Асқар Делманов, Мұхамеджан Жалғасберген, Ақселеу Әлімжанов, Уәли Жүнісов пен Ислам Каримов күміс медальдарға лайық деп танылды. Сұлтанбек Арыстанбек, Диас Оспанов, Ақбар Тұрсынбаев
қола медальдардың иегерлері болды.
Үздіктердің қатарына біздің өрендеріміздің барлығы 14 жұмысы қосылды. Ал жалпы біздің оқушылар математика, физика, химия және информатика бойынша өздерінің зерттеушілік жобаларын университет профессорларынан, оқытушыларынан, ғылыми институттар мен бейіндік компания қызметкерлерінен тұратын қазылар алдында қорғады. Олар әлемнің 20 елінен жиналған жастармен жарысты (Бразилия, АҚШ, Қытай, Аргентина, Дания, Нидерланд, Үндістан, Индонезия, Италия және т.б.).
Жеңістерімен шын жүректен құттықтаймын. Жарайсыңдар! Алған беттеріңнен таймаңдар! Сіздерге табыс тілеймін, алға қойған барлық мақсаттарыңызға жетіңіздер! Осындай дарынды жастармен болашағымыз жарқын!
